Kapiteneria e Portit të Durrësit ka ndaluar hyrjen në radën e portit të tankerit “Hanuman”, një anije që lundron nën flamurin e Sierra Leones dhe që rezulton e listuar nga Inteligjenca e Mbrojtjes së Ukrainës (GUR) si pjesë e së ashtuquajturës “flotë hije” ruse.
Sipas njoftimit, vendimi është marrë më 28 gusht, duke mos lejuar hyrjen e anijes me numër IMO 9295048.
Në databazën e GUR, “Hanuman” klasifikohet si një prej anijeve të përfshira në transportin e naftës ruse dhe produkteve të saj, në kundërshtim me embargon e vendosur nga vendet e G7 dhe Bashkimi Europian, si dhe me politikën e kufirit maksimal të çmimit, të njohur si “price cap”.
Sipas të dhënave të publikuara nga shërbimi ukrainas, në shtator të vitit 2025 tankeri ka transportuar më shumë se 30 mijë tonë produkte nafte ruse nga porti i Novorossiysk drejt Turqisë.
GUR raporton gjithashtu raste kur anija ka fikur sistemin automatik të identifikimit (AIS), si dhe hyrje të saj në porte ruse. Në të dhënat e publikuara për lëvizjet e “Hanuman” figuron edhe Porti i Durrësit mes destinacioneve të vizituara më herët.
Ndalimi i tankerit nga Kapiteneria e Durrësit vjen në një periudhë kur transporti detar i naftës ruse përmes të ashtuquajturave “flota hije” është nën vëmendje të shtuar ndërkombëtare, për shkak të përpjekjeve për të anashkaluar sanksionet e vendosura ndaj Moskës.
