Një konflikt për linjën e ujit të pijshëm ka përfunduar me plagosjen e rëndë të administratorit të një pallati në Tiranë. Ngjarja ka ndodhur mëngjesin e sotëm në rrugën “Aleksandri i Madh”.
Sipas Policisë, i plagosur ka mbetur F. G., 74 vjeç, administrator i pallatit, i cili dyshohet se është sulmuar me mjet prerës nga një prej banorëve të objektit.
Menjëherë pas njoftimit, shërbimet e Komisariatit të Policisë Nr. 6 mbërritën në vendngjarje dhe, pas veprimeve të para hetimore, identifikuan si autor të dyshuar K. L., 35 vjeç.
Nga hetimet paraprake dyshohet se mes 35-vjeçarit dhe administratorit ka nisur një konflikt për linjën e ujit të pijshëm të pallatit. Gjatë përplasjes, 35-vjeçari dyshohet se ka goditur me mjet prerës 74-vjeçarin, duke i shkaktuar plagë të rënda.
I plagosuri është transportuar me urgjencë në spital dhe ndodhet nën kujdesin e mjekëve.
Ndërkohë, autori i dyshuar është arrestuar menjëherë pas ngjarjes. Materialet procedurale i janë referuar Prokurorisë, ndërsa hetimet vijojnë për zbardhjen dhe dokumentimin e plotë të rrethanave të konfliktit.
