Komisioni Evropian ka reaguar pas njoftimit se Ratko Mlladiç pritet të varroset në Serbi me nderime të plota shtetërore, duke theksuar se glorifikimi i kriminelëve të luftës bie ndesh me vlerat themelore evropiane.
Në një përgjigje për Radion Evropa e Lirë, Komisioni bëri të qartë se u takon autoriteteve serbe të vendosin se çfarë roli do të kenë në organizimin e funeralit, por përcolli një mesazh të prerë lidhur me nderimet ndaj Mlladiçit.
“Komisioni Evropian beson se çdo glorifikim i kriminelëve të luftës është në kundërshtim me vlerat më themelore evropiane dhe nuk ka vend në BE ose në vendet kandidate për në BE”, thuhet në reagim.
BE rikujtoi se Mlladiç ishte dënuar me burgim të përjetshëm për krime kundër njerëzimit dhe gjenocidin në Srebrenicë.
“Nëse Ratko Mlladiç varroset në Serbi, u takon autoriteteve serbe të konfirmojnë çdo rol që mund të kenë në organizimin ose varrimin e tij”, deklaroi Komisioni Evropian.
Reagimi nga Brukseli vjen pasi ministri serb i Drejtësisë, Nenad Vujiç, njoftoi se Mlladiç pritet të varroset në Serbi me nderime të plota shtetërore.
Ratko Mlladiç ishte për vite me radhë një prej personave më të kërkuar nga drejtësia ndërkombëtare. Ai qëndroi në arrati për afro 16 vjet, pasi u padit nga Tribunali i Hagës në vitin 1995, ndërsa u arrestua më 26 maj 2011 në Lazarevo të Serbisë.
