Shqipëria ka fituar medaljen e parë të artë në Lojërat Mesdhetare “Taranto 2026”, falë mundësit Islam Dudaev, i cili triumfoi të hënën në kategorinë deri në 74 kilogramë në stilin e lirë.
Dudaev siguroi medaljen e artë pas fitores në finale ndaj Fati Vejselit, mundësit shqiptar nga Maqedonia e Veriut. Finalja u ndërpre për shkak të një dëmtimi të Vejselit, ndërsa Dudaev ishte në epërsi në momentin e ndërprerjes, duke i dhuruar Shqipërisë medaljen e parë të artë në këtë edicion të Lojërave Mesdhetare.
Dudaev, me origjinë nga Dagestani i Rusisë, garon nën flamurin shqiptar që prej vitit 2022. Ai ka një karrierë të pasur ndërkombëtare, ku spikat medalja e bronztë olimpike, si dhe medalje të arta dhe të bronzta në kampionatet evropiane dhe në Lojërat Mesdhetare.
Për Fati Vejselin, medalja e argjendtë përbën një tjetër rezultat të rëndësishëm në karrierën e tij. Mundësi nga Shkupi është një prej sportistëve që përfaqëson Maqedoninë e Veriut në arenën ndërkombëtare.
Një tjetër medalje argjendi për Shqipërinë në mundje erdhi nga Zelimkhan Abakarov, një tjetër sportist me origjinë nga Dagestani. Abakarov u mposht në finalen e kategorisë deri në 65 kilogramë në stilin e lirë nga turku Ahmet Duman me rezultatin 4-2.
Shqipëria kishte siguruar të dielën edhe medaljen e bronztë në mundje, në stilin greko-romak, me Ardit Zenelin.
Me këto rezultate, Shqipëria numëron tashmë tri medalje në “Taranto 2026”: një medalje të artë, një të argjendtë në stilin e lirë dhe një medalje të bronztë në stilin greko-romak.
