Barcelona po përgatit një ofertë për sulmuesin e Club Brugge, Nicolo Tresoldi, në rast se dështon transferimi i objektivit kryesor të katalanasve, Julian Alvarez. Sipas gazetarit Gerard Romero, klubi spanjoll mund të nisë lëvizjet për 22-vjeçarin që gjatë javës së ardhshme.
Barcelona po garon kundër kohës për të siguruar një numër nëntë të ri përpara mbylljes së merkatos së verës dhe Tresoldi është shfaqur si një nga alternativat kryesore të klubit.
Sulmuesi, i lindur në Cagliari dhe me origjinë gjermane e italiane, aktivizohet aktualisht te Club Brugge, ku ka shënuar 26 gola në 61 paraqitje. Përpara transferimit në Belgjikë, Tresoldi ka luajtur për Hannoverin, duke regjistruar 80 ndeshje, kryesisht në kategorinë e dytë të futbollit gjerman.
Sipas Romero, Tresoldi është duke pritur mundësinë e transferimit te Barcelona. Megjithatë, Club Brugge pritet të kërkojë të paktën 50 milionë euro për kartonin e tij.
Katalanasit kanë shqyrtuar edhe alternativa të tjera për sulmin, mes tyre Lautaro Martinez, Viktor Gyokeres dhe Luis Suarez. Megjithatë, Tresoldi tashmë duket se është shndërruar në një opsion serioz për drejtuesit e Barcelonës.
Mosha, profili fizik dhe aftësia për të shënuar gola e bëjnë sulmuesin gjermano-italian një kandidat tërheqës për repartin ofensiv të skuadrës së Hansi Flick.
Barcelona ka mbyllur tashmë transferimin e Jesse Bisiwut nga Club Brugge gjatë kësaj vere dhe mund t’i rikthehet klubit belg për një tjetër lojtar, nëse nuk arrin të realizojë transferimin e preferuar për Julian Alvarez.
