Një koalicion ndërkombëtar i shoqatave të tifozëve ka nisur këtë të enjte një peticion online, përmes të cilit kërkon dorëheqjen e menjëhershme të presidentit të FIFA-s, Gianni Infantino, si dhe një reformim të thellë të mënyrës së drejtimit të institucionit më të lartë të futbollit botëror.
Nisma mbështetet nga disa organizata të tifozëve, mes të cilave Football Supporters Europe, National Supporters Association dhe French Irresistibles. Përfaqësuesit e tyre akuzojnë drejtuesin e FIFA-s se ka vendosur interesat dhe figurën e tij mbi interesat e futbollit dhe komunitetit që e mbështet atë.
Në deklaratën e përbashkët që shoqëron peticionin, organizatat theksojnë se futbolli u përket para së gjithash tifozëve, të cilët mbushin stadiumet, ndjekin klubet dhe kombëtaret e tyre, udhëtojnë në vende dhe kontinente të ndryshme dhe e përcjellin pasionin për këtë sport brez pas brezi.
“Futbolli u përket atyre që mbushin stadiumet, që ndjekin klubet dhe ekipet e tyre kombëtare nëpër triumfet dhe dështimet e tyre, që udhëtojnë nëpër vende dhe kontinente, që e kalojnë sportin brez pas brezi dhe e mbajnë gjallë çdo ditë të vitit. Megjithatë, një njeri duket se beson se është më i rëndësishëm se vetë futbolli”, thuhet në deklaratën e koalicionit.
Kërkesat e organizatave nuk kufizohen vetëm te largimi i Gianni Infantinos nga drejtimi i FIFA-s. Përmes peticionit, ato kërkojnë ndryshime rrënjësore në mënyrën se si merren vendimet që ndikojnë në të ardhmen e futbollit botëror.
Një prej kërkesave kryesore është përfshirja formale dhe institucionale e përfaqësuesve të tifozëve dhe vetë futbollistëve në proceset vendimmarrëse. Sipas koalicionit, grupet që ndikohen drejtpërdrejt nga vendimet e institucioneve të futbollit duhet të kenë një rol konkret në diskutimin dhe miratimin e tyre.
Nisma përcjell mesazhin se qeverisja e futbollit duhet të jetë më përfaqësuese dhe se vendimmarrja nuk duhet të përqendrohet vetëm te drejtuesit e institucioneve.
Me sloganin “Futbolli u përket tifozëve, jo një njeriu”, organizatat synojnë të sigurojnë mbështetje ndërkombëtare për peticionin dhe të shtojnë presionin për ndryshime në drejtimin dhe strukturën vendimmarrëse të FIFA-s.
