Legjenda e Barcelonës, Carles Puyol, ka komentuar rikthimin e Jose Mourinhos në stolin e Real Madridit, duke pranuar se trajneri portugez mund ta bëjë skuadrën madrilene edhe më konkurruese.
Ish-kapiteni i Barcelonës e cilësoi Mourinhon një trajner të madh dhe kujtoi rivalitetin e fortë mes Barcelonës dhe Real Madridit gjatë periudhës kur në stolat e dy skuadrave ishin Pep Guardiola dhe Mourinho, ndërsa në fushë përballeshin Lionel Messi dhe Cristiano Ronaldo.
“Po flasim për një trajner të shkëlqyer. E takova në Barcelonë kur isha në sistemin e të rinjve dhe kur po hyja në ekipin e parë. Edhe atëherë pamë se ai dinte shumë për futbollin”, tha Puyol.
Megjithatë, ish-mbrojtësi spanjoll theksoi se Barcelona mbetet një skuadër shumë e fortë dhe do të synojë të mbrojë titullin në La Liga. Sipas tij, ardhja e mesfushorit Rodri mund ta bëjë ekipin katalanas edhe më konkurrues.
“Me Mourinhon ata mund të jenë më të fortë, por unë ende mendoj se Barcelona ka një ekip shumë të mirë dhe mund të ketë një sezon të mirë”, u shpreh Puyol.
Sezoni i ri i La Ligës ka nisur fundjavën e kaluar, ndërsa Barcelona dhe Real Madridi nuk kanë zbritur ende në fushë në javën e parë për shkak të angazhimit të disa lojtarëve të tyre në fazat e fundit të Kupës së Botës.
