Sezoni i ri i Premier League 2026-2027nis sot me përballjen mes kampionëve në fuqi, Arsenalit, dhe Coventry City, në orën 21:00. Sezoni i ri sjell edhe disa ndryshime të rëndësishme në rregullore, me synim përshpejtimin e lojës dhe reduktimin e vonesave gjatë ndeshjeve.
Një nga ndryshimet kryesore lidhet me rivëniet anësore dhe rivëniet e topit në lojë, ku lojtarët do të kenë vetëm pesë sekonda për të vepruar pasi gjyqtari të nisë numërimin. Nëse koha tejkalohet, topi i kalon kundërshtarit ose akordohet goditje nga këndi.
Ndryshime ka edhe për dëmtimet. Një lojtar që del jashtë fushës për shkak të një dëmtimi duhet të qëndrojë jashtë për një minutë, ndërsa për portierët do të ketë masa të veçanta në rastet kur dyshohet se dëmtimi përdoret për të fituar kohë.
Edhe zëvendësimet do të jenë më të shpejta. Nëse një lojtar vonon daljen nga fusha për më shumë se 10 sekonda, zëvendësuesi mund të detyrohet të presë edhe një minutë para se të hyjë.
Një tjetër risi e rëndësishme është zgjerimi i kompetencave të VAR-it, i cili për herë të parë mund të ndërhyjë në raste që lidhen me kartonin e dytë të verdhë, nëse ka ndodhur një gabim i qartë i gjyqtarit.
Premier League, megjithatë, nuk do të aplikojë rregullin për mbulimin e gojës me duar gjatë komunikimit dhe as pushimet e detyrueshme për hidratim, të përdorura në Kupën e Botës 2026.
