Saga e transferimit të Julian Alvarez vazhdon të dominojë merkaton e verës, ndërsa sulmuesi argjentinas mbetet një nga objektivat kryesorë të Barcelonës.
Alvarez dëshiron të largohet nga Atletico Madrid dhe t’i bashkohet klubit katalanas, ndërsa drejtuesit madrilenë nuk kanë ndërmend ta lejojnë transferimin e tij te një rival direkt. Atletico kërkon një shumë shumë të lartë për kartonin e argjentinasit, ndërsa është përmendur edhe klauzola e tij prej 500 milionë eurosh.
Situata ka acaruar edhe marrëdhënien mes Alvarezit dhe tifozëve të Atleticos. Në rrugët e Madridit janë shfaqur mesazhe kundër sulmuesit, ku numri 19, që mban në fanellë, është vendosur i kryqëzuar në një tabelë në formën e shenjës së trafikut. Krahas saj është shkruar edhe mesazhi “Julian fuera”, që do të thotë “Julian jashtë”.
Atletico thuhet se ka pranuar edhe oferta për ta transferuar te Arsenali, por vetë Alvarez i ka refuzuar ato, pasi dëshira e tij është Barcelona.
Afati kalimtar mbetet i hapur deri në fund të muajit dhe tashmë mbetet për t’u parë nëse Atletico do të arrijë ta mbajë argjentinasin apo ai do të largohet nga Madridi.
