Në Spanjë janë të bindur se Lautaro Martinez mund të ketë arritur një marrëveshje me Barcelonën. Sipas El Chiringuito TV, javën e kaluar ka pasur një takim formal mes drejtorit sportiv të katalanasve, Deco, dhe agjentit të sulmuesit të Interit, Alejandro Camano, ku palët thuhet se kanë arritur një marrëveshje paraprake.
Pas vështirësive për të transferuar Julian Alvarez, Barcelona po kërkon një tjetër goditje të madhe në fundin e merkatos dhe emri i Lautaros po përmendet gjithnjë e më shumë. Sipas mediave spanjolle, katalanasit janë të gatshëm të bëjnë një përpjekje të madhe financiare, me një ofertë prej rreth 100 milionë eurosh për kapitenin e Interit.
Në kampin zikaltër, megjithatë, situata mbetet e pandryshuar. Interi nuk ka marrë ende asnjë ofertë zyrtare dhe qëndrimi i klubit është i qartë: Lautaro Martinez konsiderohet i pashitshëm.
Trajneri Cristian Chivu e ka theksuar këtë edhe në konferencën për shtyp, duke e cilësuar argjentinasin si kapitenin e skuadrës dhe një lojtar mbi të cilin Interi dëshiron të ndërtojë të ardhmen.
“Lautaro është kapiteni ynë, ndaj duam ta mbajmë fort, sepse përfaqëson gjithçka që kemi qenë dhe duam të jemi”, është shprehur Chivu. Megjithatë, trajneri pranoi se merkatoja mund të sjellë gjithmonë surpriza, duke lënë të hapur çdo skenar.
Për momentin, Barcelona po tenton afrimin e Lautaros, por Interi nuk duket i gatshëm të heqë dorë nga kapiteni i tij.
