Një konflikt mes disa personave është regjistruar mesditën e sotme në rrugën “Ali Demi” në Tiranë, pranë ambienteve të Partisë Socialdemokrate. Sipas policisë, gjatë përplasjes janë përdorur sende të forta dhe është dëmtuar xhami i zyrës së subjektit elektoral.
“Në sallën operative të DVP Tiranë ka ardhur një telefonatë rreth orës 14:00 për një konflikt midis disa shtetasish në ambientet e një zyre elektorale. Gjatë këqyrjes së vendit të ngjarjes, është konstatuar i dëmtuar, dyshohet me sende të forta, xhami i zyrës së subjektit elektoral. Po ashtu, janë gjetur dy fishekë luftarak”, thuhet në njoftimin zyrtar të policisë.
Personat e përfshirë në konflikt janë larguar nga vendi i ngjarjes me një automjet, ndërsa forcat e policisë dhe grupi hetimor ndodhen në terren për të identifikuar dhe shpallur në kërkim autorët. Hetimet po vijojnë nën drejtimin e Prokurorisë për zbardhjen e motivit dhe rrethanave të ngjarjes.
Nga ana tjetër, Partia Socialdemokrate ka reaguar duke u distancuar nga konflikti, duke theksuar se ngjarja nuk ka asnjë lidhje me zyrën apo aktivitetin e saj elektoral.
“Ngjarja e ndodhur këtë mesditë në rrugën ‘Ali Demi’ nuk ka asnjë lidhje me zyrën tonë elektorale apo me aktivitetin e Partisë Socialdemokrate. Vendi ku ka ndodhur incidenti ndodhet pranë ambienteve tona, por asnjë nga anëtarët apo simpatizantët tanë nuk ka qenë i përfshirë në konfliktin në fjalë. Dënojmë çdo akt dhune dhe presim që organet kompetente të sqarojnë plotësisht rrethanat e ngjarjes”, thuhet në reagimin zyrtar të PSD.
