Richard Grenell, një nga bashkëpunëtorët e afërt të Presidentit Donald Trump ka përgënjeshtruar drejtorin e zyrës së shtypit të Partisë Demokratike, Alfred Lela, pas një shkrimi ku Grenell akuzohej si “lobist i padeklaruar” i kryeministrit Edi Rama.
Sipas një lajmi të publikuar në median e drejtuar nga Lela, Grenell dyshohej se kishte tentuar të përfshinte në axhendën e vizitës së djalit të presidentit Trump një ndalesë në Tiranë për një takim me kryeministrin shqiptar. Në realitet, djali i ish-presidentit amerikan zhvilloi së fundmi një vizitë në Beograd, ku u takua me Presidentin Aleksandar Vuçiç.
Grenell reagoi ashpër në rrjetet sociale, duke shpërndarë artikullin në fjalë dhe duke kërkuar publikisht përgënjeshtrimin e informacionit.
“I dashur Alfred Lela, e kuptoj që jeni disa ditë larg zgjedhjeve të rëndësishme. E kuptoj që emocionet janë të larta. Zgjedhjet tuaja i kam ndjekur në heshtje, sepse Shqipëria është një aleate e rëndësishme dhe e besuar e Amerikës në NATO. Por kjo histori nga media juaj është një gënjeshtër TOTALE. Duhet të korrigjohet menjëherë dhe të hiqet nëse ju interesojnë faktet,” shkroi Grenell.
Deri më tani, nuk ka një reagim zyrtar nga Alfred Lela apo Partia Demokratike lidhur me deklaratat e Grenell.
Ndërkohë, postimi në X i Grenell është shpërndarë në profilin e tij zyrtar dhe nga djali i presidentit amerikan, Donald Trump Jr.
