Agjencia ndërkombëtare e lajmeve Reuters i ka kushtuar një artikull protestës së studentëve në Tiranë, e cila u shoqërua me përplasje të dhunshme mes protestuesve dhe forcave të policisë.
Studentët protestues hodhën tulla dhe blloqe betoni drejt Ministrisë së Arsimit në Tiranë të martën, ndërsa policia u përgjigj me gaz lotsjellës dhe autobotë me ujë, teksa një protestë kombëtare për arsimin dhe çështjet sociale u shndërrua në dhunë.
Sipas Reuters, policia ndaloi disa protestues gjatë përplasjeve.
Organizatorët studentorë deklaruan se protesta lidhej me kushtet në universitete, kostot e larta të arsimit të lartë, mbështetjen financiare për studentët dhe mundësitë e punësimit pas diplomimit.
Disa protestues shprehën gjithashtu pakënaqësinë e tyre ndaj pabarazisë sociale dhe qeverisë.
“Ajo që i duhet Shqipërisë është një revolucion, një ndryshim, një përmbysje e plotë e sistemit, sepse kështu nuk mund të vazhdohet”, deklaroi për Reuters protestuesja Luljeta Kola.
Ajo theksoi se në Shqipëri ekziston një padrejtësi e thellë sociale dhe një hendek i madh mes të pasurve dhe të varfërve.
Reuters e vendos protestën në Shqipëri në kontekstin e një vale më të gjerë aktivizmi studentor në Europë. Në Francë, nxënësit e shkollave të mesme kanë organizuar prej javësh protesta dhe bllokime shkollash, duke kërkuar më shumë mësues dhe kushte më të mira, ndërsa denoncojnë degradimin e ndërtesave shkollore dhe mbipopullimin e klasave.
Agjencia citon edhe reagimin e zëvendëskryeministres Albana Koçiu, e cila shkroi në Facebook:
“Dhuna nuk ka qenë, nuk është dhe nuk do të jetë kurrë zgjidhje. Hedhja e gurëve, sulmi ndaj institucioneve dhe Policisë së Shtetit, si dhe shkatërrimi i pakuptimtë i pronës publike, nuk janë mënyra se si duhet të shprehen të rinjtë.”
Artikulli i Reuters është raportuar nga Fatos Bytyçi dhe është shoqëruar me fotografi të protestës në Tiranë, të realizuara nga fotoreporteri Florion Goga.
