Familjet e ushtarëve amerikanë të vrarë gjatë konfliktit SHBA-Izrael kundër Iranit po përballen me një betejë të dytë: atë me burokracinë e Pentagonit për të marrë pagesat dhe përfitimet që u takojnë pas humbjes së të afërmve.
Rasti që ka shkaktuar reagime në SHBA është ai i Libby Klinner, bashkëshortes së majorit Alex Klinner, 33 vjeç, i cili humbi jetën në muajin mars gjatë rrëzimit të një avioni furnizues KC-135 në Irakun perëndimor. Avioni po mbështeste operacionet amerikane kundër Iranit.
Sipas raportimeve të The Telegraph dhe Associated Press, Klinner ishte një nga gjashtë pjesëtarët e ekuipazhit që vdiqën në atë mision. Që prej nisjes së konfliktit me Iranin, 18 ushtarakë amerikanë janë vrarë dhe qindra të tjerë janë plagosur.
Por ajo që e ktheu rastin në skandal publik ishte pretendimi i vejushës se Forcat Ajrore Amerikane e kishin konsideruar të papërshtatshme për disa përfitime shtesë, me argumentin se Kongresi nuk kishte shpallur zyrtarisht luftë.
“Burri im humbi jetën sepse jemi në luftë, dhe pastaj më thanë se teknikisht nuk është luftë, ndaj humbasim disa përfitime”, tha Libby Klinner për AP.
Pas reagimit të saj në rrjetet sociale, rasti mori vëmendje kombëtare. Forcat Ajrore më pas deklaruan se kishin kontaktuar familjen për të sqaruar pagesat dhe përfitimet, duke thënë se Klinner do të merrte të gjitha përfitimet për të cilat kishte të drejtë.
Megjithatë, çështja ka hapur një debat më të gjerë në SHBA: si mund të dërgohen ushtarë në misione luftarake, të vriten në operacione kundër një shteti tjetër, por administrata të shmangë termin “luftë” kur vjen puna te përgjegjësia ligjore dhe financiare ndaj familjeve të tyre.
Në thelb, familjet e ushtarëve të vrarë po përballen me një paradoks cinik: shteti i quan heronj kur bien në mision, por kur vjen radha e pagesave, u kujton se “lufta” nuk ekziston zyrtarisht.
