Djali i presidentit serb Aleksandar Vuçiç, Danilo Vuçiç, ka marrë pjesë këtë të hënë në Beograd në ceremoninë mortore të Ratko Mladiç, ish-komandantit të forcave serbe të Bosnjës, i dënuar me burgim të përjetshëm për gjenocid, krime lufte dhe krime kundër njerëzimit.
Vetë presidenti Aleksandar Vuçiç kishte njoftuar se nuk do të merrte pjesë në funeral, duke e justifikuar mungesën me angazhime zyrtare të programuara më parë. Por në ceremoni ishte i pranishëm djali i tij, Danilo.
Prania nuk kufizohej te familja e presidentit. Në funeral morën pjesë edhe zyrtarë të lartë serbë, mes tyre ministri i Mbrojtjes Bratislav Gašić, ministri i Drejtësisë Nenad Vujić dhe ministri pa portofol Nenad Popović. Ceremonia fetare u drejtua nga Patriarku i Kishës Ortodokse Serbe, Porfirije.
Mijëra njerëz u mblodhën pranë Kishës së Shën Lukës në Beograd për t’i dhënë lamtumirën Mladiçit. Turma mbante flamuj serbë dhe fotografi të ish-gjeneralit, ndërsa për shkak të numrit të madh të pjesëmarrësve u vendosën edhe ekrane të mëdha jashtë kishës për transmetimin e ceremonisë.
Mladiç vdiq më 27 gusht 2026, në moshën 84-vjeçare, ndërsa vuante dënimin me burgim të përjetshëm. Ai ishte dënuar nga drejtësia ndërkombëtare për gjenocidin e Srebrenicës, ku në korrik 1995 u vranë më shumë se 8 mijë burra dhe djem boshnjakë myslimanë, si dhe për krime të tjera gjatë luftës në Bosnjë, përfshirë rrethimin e Sarajevës.
Ceremonia ka shkaktuar reagime të forta ndërkombëtare. Komisionerja e BE-së për Zgjerimin, Marta Kos, anuloi vizitën e planifikuar në Serbi, duke e lidhur vendimin me mënyrën se si autoritetet serbe po trajtonin kthimin dhe nderimin e Mladiçit. Brukseli ka paralajmëruar se glorifikimi i kriminelëve të dënuar të luftës bie ndesh me vlerat mbi të cilat mbështetet rruga e Serbisë drejt Bashkimit Europian.
Trupi i Mladiçit ishte transportuar nga Holanda drejt Beogradit më 3 shtator me avion të qeverisë serbe. Arkivoli u shoqërua gjatë fluturimit edhe nga ministri serb i Drejtësisë dhe, pas mbërritjes, u transportua nën masa policore.
Kështu, ndërsa Aleksandar Vuçiç zgjodhi të mos shfaqej personalisht në funeralin që ka shkaktuar përplasje të re me Brukselin, familja presidenciale ishte aty: Danilo Vuçiç u fotografua mes atyre që shkuan t’i jepnin lamtumirën njeriut të dënuar për gjenocidin e Srebrenicës.
