Kryeministri grek Kyriakos Mitsotakis ka dërguar një mesazh të qartë drejt Turqisë, duke deklaruar se Greqia nuk do t’i kërkojë askujt leje për mënyrën se si forcon mbrojtjen e saj dhe se ruan të drejtën për të zgjeruar ujërat territoriale deri në 12 milje detare.
Duke folur në konferencën për shtyp në kuadër të Panairit të 90-të Ndërkombëtar të Selanikut, Mitsotakis u pyet për zhvillimet e fundit në marrëdhëniet greko-turke, përfshirë mosmarrëveshjet për parqet detare dhe pretendimet e Ankarasë në Egje.
Kryeministri tha se politika e dialogut me Turqinë ka sjellë rezultate dhe se Deklarata e Athinës ka krijuar një kuadër institucional komunikimi mes dy vendeve. Megjithatë, ai theksoi se përmirësimi i dialogut nuk nënkupton tërheqje nga pozicionet kombëtare të Greqisë.
Mitsotakis kujtoi se Athina ka forcuar ndjeshëm kapacitetet e saj parandaluese dhe ushtarake gjatë viteve të fundit.
“Greqia nuk do t’i kërkojë leje askujt për mënyrën se si armatoset”, deklaroi kryeministri grek.
Sipas tij, Athina kërkon marrëdhënie të mira me Ankaranë, por mes dy vendeve ekziston një mosmarrëveshje kryesore: përcaktimi i zonave detare në Egje dhe Mesdheun Lindor. Mitsotakis bëri të qartë se Greqia nuk do të hyjë në negociata për çështje të tjera që Turqia i ngre si pretendime, por që Athina nuk i njeh si mosmarrëveshje.
Një nga deklaratat më të forta lidhej me ujërat territoriale. Mitsotakis përsëriti se Greqia ruan “të drejtën e patjetërsueshme” për t’i zgjeruar ato deri në 12 milje detare, kur dhe në mënyrën që ajo e konsideron të përshtatshme.
Kryeministri foli gjithashtu për projektin e kabllos elektrike që synon të lidhë Greqinë me Qipron. Ai tha se procedurat për projektin mund të rifillojnë brenda pak muajsh dhe se Turqia nuk ka legjitimitet për ta penguar.
Sipas Mitsotakis, projekti është një nga projektet më të rëndësishme europiane të ndërlidhjes dhe financohet nga Bashkimi Europian me më shumë se 600 milionë euro. Athina po bashkëpunon edhe me Francën për këtë çështje.
Deklaratat vijnë në një periudhë kur Greqia po përgatitet për mundësinë e tensioneve të reja me Turqinë, pas mosmarrëveshjeve të fundit në Egje. Athina këmbëngul se dialogu duhet të vazhdojë, por njëkohësisht po sinjalizon se nuk do të bëjë kompromis për çështjet që i konsideron të lidhura me sovranitetin dhe mbrojtjen kombëtare.
