Monika Kryemadhi u paraqit këtë të hënë në ambientet e SPAK, në zbatim të një vendimi të Gjykatës së Posaçme, ku u shfaq me tone ironike dhe batuta ndaj prokurorëve dhe agjentëve të BKH-së.
“Ju kërkova votën për koalicionin opozitar. Agjentë të BKH-së, prokurorë, protokoll, shërbim, gardë, i thirrur, i pathirrur, çdo njeri që më dilte përpara”, tha ajo me ironi para gazetarëve, duke e kthyer paraqitjen në një skenë fushate.
Kryemadhi deklaroi se ishte në SPAK për të kërkuar votën jo vetëm për koalicionin opozitar, por edhe për ish-bashkëshortin e saj, Ilir Meta, i cili ndodhet aktualisht në paraburgim dhe kandidon për deputet.
“Sigurisht që kërkoj votën për babain e fëmijëve të mi. Do vijoj ta kërkoj deri më 11 maj, ora 19:00, kur mbyllen qendrat e votimit”, theksoi deputetja e Partisë së Lirisë.
Sipas saj, edhe vetë prokurorët dhe agjentët e BKH-së janë të vetëdijshëm për “përdorimin politik të drejtësisë” nga qeveria.
“Edhe vetë ata aty brenda e kuptojnë që mënyra e përdorimit të sistemit të drejtësisë nga Edi Rama i vendos ata në një pozitë të vështirë. Prandaj besoj se edhe të nënshtruarit e sistemit të drejtësisë do të votojnë për përmbysjen më 11 maj”, shtoi Kryemadhi.
Ajo dhe Ilir Meta janë nën hetim nga SPAK për korrupsion, pastrim parash dhe fshehje pasurie, ndërsa kreu i PL-së kërkon të rikthehet në Kuvend nga qelia.
