Adriatik Lapaj, kreu i “Shqipëria Bëhet,” ka lënë të hapur mundësinë e një bashkimi mes partive të koalicionit, duke thënë se është i hapur për të gjitha variantet. Deklarata e tij ka ngjallur reagime, përfshirë atë të Endri Shabanit, kreut të Nismës Thurje, i cili theksoi se një vendim i tillë nuk është diskutuar ende.
“Nisma Thurje ka qenë një organizatë e shoqërisë civile që e nisëm bashkë me zotin Lapaj. Adriatiku është i lirë të rikthehet në çdo kohë te Nisma Thurje, pasi kjo është shtëpia e tij,” tha Shabani në një intervistë për A2CNN. Ai shtoi se pas përfundimit të zgjedhjeve, përparësi ka vazhdimi i bashkëpunimit mes partive të koalicionit për zgjedhjet e ardhshme, dhe jo domosdoshmërisht shkrirja e tyre.
Lidhur me ndarjen e mandatit në Tiranë, Shabani theksoi se kjo tashmë është çështje që i përket Komisionit Qendror të Zgjedhjeve (KQZ), i cili duhet të verifikojë dokumentacionin përkatës dhe të kalojë te lista e hapur.
Sa i takon procesit të rinumërimit të votave në Tiranë, Shabani u shpreh se nuk kanë pasur kurrë dyshime për manipulimin e votave në kuti dhe se rinumërimi e konfirmoi këtë fakt.
