Kryeministri Edi Rama i është kundërpërgjigjur me ironi Nigel Farage, pas pretendimit të tij se “1 në 50 shqiptarë në Britani janë në burg”. Rama e quajti këtë një “klasik të manualit post-Brexit: nëse tingëllon frikshëm, duhet të jetë e vërtetë”.
“Upsss… vetë z. Nigel Farage më sfidoi për faktet! Çfarë nderi – për një ‘burrë gjigand’, siç më përshkroi ai, që vij nga një ‘vend i vogël’,” shkruan Rama në “X”.
Ai thekson se të dhënat reale tregojnë krejt të kundërtën, duke shtuar se edhe nëse do të llogariteshin të gjithë shqiptarët e burgosur si fajtorë, shkalla e kriminalitetit nuk do të ishte më e lartë se ajo e britanikëve.
“Kam një propozim të thjeshtë: T’i sjellim faktet në tavolinë. Nëse ‘1 në 50’ del e saktë, angazhohem t’i marr të gjithë mbrapsht. Jo për show, por publikisht,” shkruan Rama.
Por nëse kjo shifër del “karburant për tabloide”, Rama i ofron Farage një tjetër zgjidhje: “Do të marrësh diell të vërtetë, mikpritje të vërtetë dhe fakte të vërteta për Shqipërinë. Dhe gjithçka që do të kërkoj në këmbim është një zotim i vogël: herën tjetër kur dikush përgojon shqiptarët, të jesh ti i pari që i thua të ndalet.”
Rama e mbyll me një ftesë ironike:
“Hajde, Nigel. Edhe nëse humb në kontrollin e fakteve, fiton një komb të tërë miqsh për gjithë jetën.”
