VNA ka mësuar se sot pasdite, në llogaritë e prokurorëve dhe oficerëve të prokurorisë më të madhe në vend, asaj të Tiranës, kanë kaluar përfundimisht pagat e vonuara të muajit gusht. Këto pagesa duhej të lëvroheshin brenda datës 5 shtator, por u vonuan për ditë me radhë si pasojë e përplasjes së ashpër institucionale mes sistemit të drejtësisë dhe qeverisë.
Sfondi i përplasjes për pagat
Kriza financiare lindi pasi Këshilli i Lartë Gjyqësor (KLGJ) dhe Këshilli i Lartë i Prokurorisë (KLP) miratuan vendimet për rritjen e pagës referuese të magjistratëve, duke zbatuar vendimet e mëparshme të Gjykatës Kushtetuese, pas kalimit të afateve ligjore nga Kuvendi.
Mirëpo, Ministria e Financave dhe Dega e Thesarit bllokuan kalimin e fondeve, me argumentin se organet e drejtësisë nuk mund t’i caktonin vetë pagat. Bllokimi shkaktoi reagime të forta nga shoqatat e magjistratëve dhe kërkesa zyrtare për zhbllokimin urgjent të pagesave.
Ndryshimet ligjore në Kuvend
Më 17 shtator, mazhoranca në Kuvend miratoi, me procedurë të përshpejtuar, një projektligj të ri për pagat e magjistratëve. Formula e re e votuar nga mazhoranca parashikon një rritje të pagave me rreth 2%, masë kjo pothuajse 10 herë më e ulët se rritja e përllogaritur nga KLGJ-ja dhe KLP-ja përmes vendimeve të tyre.
Përplasja pritet të vijojë në rrugë ligjore dhe kushtetuese.
