Qeveria shqiptare ka nisur lëvizje në Misionet Diplomatikejashtë vendit.
Siç ka mësuar VNA, në kuadër të këtyre ndryshimeve, ambasadori i deritanishëm i Shqipërisë në Mbretërinë e Bashkuar, Uran Ferizi, është propozuar për t’u transferuar në krye të Misionit të Përhershëm pranë OSBE-së dhe Organizatave Ndërkombëtare në Vjenë.
Me këtë lëvizje, nga Misioni në Vjenë largohet diplomatja dhe ish-deputetja e Partisë Socialiste, Eglantina Gjermeni, e cila mbante këtë detyrë prej vitit 2022.
Komisioni për Politikën e Jashtme pritet të zhvillojë seancën dëgjimore me kandidatin e ri për të shqyrtuar platformën dhe objektivat e tij përfaqësuese në këtë organizatë shumëpalëshe.
Uran Ferizi u emërua si ambasador në Londër në fillim të vitit 2024. Mandati i tij në Mbretërinë e Bashkuar u karakterizua nga vëmendja mediatike lidhur me profilin e tij personal dhe prononcimet publike për çështjet e komunitetit shqiptar atje. Pas miratimit të procedurave parlamentare dhe dekretimit nga Presidenti, pritet që Ferizi të marrë zyrtarisht drejtimin e misionit në Austri, ndërsa mbetet për t'u caktuar emri i ri që do ta zëvendësojë atë në Londër.
