Eurodeputetja Isabel Wiseler-Lima ka ngritur shqetësimin për mosheqjen e imunitetit të Belinda Ballukut, gjatë takimit të 22-të të Komitetit Parlamentar të Stabilizim-Asociimit Shqipëri-Bashkimi Europian, të zhvilluar në Tiranë.
Në fjalën e saj, Wiseler-Lima u ndal te reforma në drejtësi dhe funksionimi i institucioneve të reja, duke vënë theksin te rëndësia e pavarësisë së sistemit.
Eurodeputetja deklaroi se SPAK gëzon besimin e qytetarëve shqiptarë, ndërsa theksoi se forcimi i pavarësisë së institucioneve të drejtësisë është një proces që kërkon kohë.
Ajo e cilësoi reformën në drejtësi si një proces të pakthyeshëm, duke nënvizuar nevojën që institucionet e dala prej saj të vijojnë punën në mënyrë të pavarur.
Në këtë kontekst, Wiseler-Lima ngriti si çështje edhe mosheqjen e imunitetit të Ballukut, duke e lidhur atë me diskutimin më të gjerë mbi funksionimin e drejtësisë dhe respektimin e pavarësisë institucionale.
