Partia Demokratike ka dalë kundër projektkalendarit të punimeve të Kuvendit, duke refuzuar përfshirjen e Reformës Administrativo-Territoriale për miratim më 8 tetor. Opozita kërkon ndërprerjen e procedurës përshpejtuese dhe vijimin e konsultimit publik, duke akuzuar mazhorancën socialiste për një proces unipolar dhe fiktiv.
Kreu i Grupit Parlamentar të PD-së, Gazment Bardhi, u shpreh prerazi kundër gjatë Konferencës së Kryetarëve:
"Partia Demokratike është kundër këtij kalendari që keni paraqitur. Ju keni përfshirë për diskutim projektligjin për Reformën Territoriale. Kjo është një çështje e papranueshme për shumë faktorë. Së pari, nuk mund të kaloni një reformë kaq të rëndësishme pa konsensusin e opozitës. Gjithashtu, ju zhvilluat një proces tallës me shqiptarët. Ngritët një komision, ndërkohë që ndarjen e kishit në tavolinë dhe e kishit të gatshme. Sot e sillni këtë çështje këtu, të përfshirë në kalendar. Edhe ajo që po bëni sot është një tallje dhe shkelje e Kushtetutës, pasi aktualisht ka një proces konsultimi publik, ndërsa ju parashikoni diskutimin e projektligjit në komisione."
Si u realizua reforma nga PS dhe sa ndryshon numri i bashkive?
Njëanshmëria e procesit: Reforma Territoriale nisi në vitin 2014 me miratimin nga PS-ja pas bojkotit të opozitës, e cila e akuzoi mazhorancën për ndarje kufijsh me prapavijë elektorale. Edhe gjatë rishikimeve parlamentare të mëvonshme, PS ka ecur e vetme me projektligjin e saj, duke rrëzuar propozimet e opozitës për shtim të njësive administrative pranë qytetarëve.
Ndryshimi i numrit të bashkive:
* Para vitit 2014: Shqipëria kishte 373 njësi vendore (65 bashki dhe 308 komuna).
* Harta aktuale (2014–2026): Numri u reduktua në 61 bashki (komunat u shkrijnë).
* Projektligji i ri i PS-së (2026): Parashikon shkrirjen e 15 bashkive të vogla për ta reduktuar numrin përfundimtar në 46 bashki (p.sh. Rrogozhina i bashkohet Kavajës, Dimali e Poliçani Beratit, Klosi Matit, Selenica Vlorës, etj.).
Opozita e konsideron këtë tkurrje të mëtejshme si largim të shërbimeve nga qytetarët dhe një tentativë për të konsoliduar avantazhin elektoral të mazhorancës në zgjedhjet e ardhshme.
