Kryebashkiaku i Tiranës, Erion Veliaj, ka propozuar që Hashim Thaçi, Kadri Veseli, Jakup Krasniqi dhe Rexhep Selimi të shpallen “Qytetarë Nderi” të kryeqytetit.
Në një deklaratë nga paraburgimi, Veliaj shprehet se vendimi i Hagës ndaj katër ish-krerëve të UÇK-së e ka tronditur thellë, ndërsa thekson se procesi juridik duhet të ndjekë rrugën dhe standardet e drejtësisë.
Sipas tij, kjo nismë nuk synon të ndërhyjë në procesin gjyqësor, por të shprehë mirënjohjen e Tiranës për kontributin historik të ish-drejtuesve të UÇK-së në luftën për liri dhe në ndërtimin e shtetit të Kosovës.
Veliaj u bëri thirrje edhe kryetarëve dhe këshillave bashkiakë të qyteteve të tjera shqiptare që të ndërmarrin nisma të ngjashme.
Në deklaratë, ai ndalet edhe te situata e tij personale, duke thënë se prej 19 muajsh ndodhet në izolim dhe pa mundësi reale për të ushtruar mandatin e kryetarit të Bashkisë së Tiranës. Megjithatë, sipas tij, çështja e Kosovës dhe kujtesa e luftës së saj për liri janë më të mëdha se drama e tij personale.
Pjesë nga deklarata e Veliajt:
“Sigurisht, jo për ta zëvendësuar drejtësinë me politikën. Jo për t’i treguar një gjykate se çfarë duhet të vendosë. Por për të ushtruar të drejtën e qytetit tonë për të shprehur mirënjohjen dhe vlerësimin e vet për kontributin e tyre historik në rrugëtimin e Kosovës drejt lirisë dhe shtetësisë.
Tirana fatkeqësisht nuk mund t’ua japë dot lirinë. Por Tirana duhet t’i nderojë ata.
Prandaj sot, nga vendi ku ndodhem, dua t’u them Hashim Thaçit, Kadri Veselit, Jakup Krasniqit dhe Rexhep Selimit: Procesi juaj juridik do të vazhdojë. Drejtësia do të ndjekë rrugën e saj. Por edhe kujtesa jonë do të ndjekë të vetën.
Ata duhet dhe do të jenë nderi i kryeqytetit tonë, Tiranës.”
