“Besa” e kërkuar me ngulm nga kryeministri Edi Rama si metoda më e re e komunikimit politik po kthehet dalëngadalë në një shfaqje ku propaganda kërkon të duket popullore, por shpesh përfundon thjesht qesharake.
Një nga episodet e fundit vjen nga deputetja socialiste Sara Mila, një nga emrat më të komentuar të grupit parlamentar të PS-së, por edhe ndër më të zellshmet për të qenë e pranishme në rrjetet sociale. Gjatë takimeve të kësaj jave me qytetarë të qarkut të Elbasanit, Mila ka publikuar një video ku vendos një bast me një qytetar.
Ajo i premton se do të festojë ditëlindjen me të, ose në të kundërt do t’i bëjë urën që ai kërkon në fshatin e tij. Por këtu nis pjesa më interesante e historisë: ditëlindja e qytetarit kishte kaluar, pasi ai e kishte pasur në muajin gusht.
Pas “humbjes” së bastit, deputetja i premton ndërtimin e urës përpara festimit të ditëlindjes së tij të ardhshme, në gushtin e vitit 2027.
Pra, në logjikën e re të “besës” politike, një urë që duhet të jetë përgjegjësi normale institucionale kthehet në bast, në video, në premtim personal dhe në afat ditëlindjeje. Qytetari nuk merr një përgjigje administrative, merr një skenë. Nuk merr një procedurë, merr një premtim për kamerë.
Ky nuk është episodi i parë ku Sara Mila përpiqet të ndërtojë profilin e deputetes që dëgjon “hallet” e qytetarëve. Disa javë më parë, ajo postoi një video me bllokun e shënimeve të problematikave që pretendonte se kishte mbledhur në terren. Pasi mediat komentuan se blloku dukej bosh, Mila doli në Euronews dhe lexoi problemet e qytetarëve që, sipas saj, i kishte mbajtur shënim.
Në një vend normal, takimet me qytetarët do të shërbenin për të evidentuar probleme, për të ndjekur institucione dhe për të kërkuar zgjidhje. Në versionin shqiptar të “besës”, ato rrezikojnë të kthehen në format televiziv, ku deputeti mban bllok, vendos baste dhe premton ura me kalendar ditëlindjesh.
Në fund, kjo është “besa” në version propagande: qytetari kërkon urë, deputetja vë bast, kamera regjistron dhe problemi lihet për ditëlindjen tjetër. Ura mund të ndërtohet ose jo; rëndësi ka që Sara u duk sikur po bënte punë…
