Ish-deputeti i Partisë Socialiste, i ndjeri Bashkim Fino, ka qenë një nga zërat e parë dhe më kritikë në Kuvend lidhur me prishjen e piramidës së pagave në Shqipëri.
Çështja kryesore që ai ngriti, duke nisur që gjatë debateve për buxhetin në vitin 2018 dhe në vijim, kishte të bënte me anomalinë e krijuar nga rritja e pagave në sistemin e ri të drejtësisë.
Shqetësimi kryesor i ngritur nga Fino ishte përmbysja e hierarkisë së shtetit. Ai e konsideronte të papranueshme që krerët e gjykatave, prokurorët apo anëtarët e institucioneve të vetting-ut të kishin paga dukshëm më të larta se Presidenti i Republikës, i cili është numri një i protokollit dhe hierarkisë shtetërore.
Gjatë debateve në komisione, Fino pati përplasje publike me drejtues të institucioneve të drejtësisë, duke u kujtuar se paguheshin me mbi “4 milionë lekë të vjetra” në muaj dhe përsëri kërkonin shpërblime apo shtesa.
Për të zgjidhur këtë kaos, ai kërkoi zyrtarisht nga qeveria ngritjen e një grupi ndërministror, që të bënte një kategorizim të ri dhe uniform të pagave, me qëllim që asnjë zyrtar në Republikën e Shqipërisë të mos paguhej më shumë se Presidenti.
Amendamenti i propozuar nga Fino parashikonte detyrimin e Kuvendit për miratimin e një ligji të ri për piramidën e pagave.
“Nuk mund të kenë pagë disa fish më të lartë se Presidenti, Kryeministri apo kreu i Kuvendit, se nga ne deputetët nuk flas se do ishte konflikt interesi”, shprehej Bashkim Fino.
Për ta kuptuar më mirë deformimin e këtij koncepti, Fino merrte si shembull festimet ceremoniale për festat e nëntorit.
“Po vijnë festat e nëntorit. Protokolli duhet të ndryshojë. Sipas nivelit të pagave, i pari duhet të rreshtohet kryetari i Gjykatës së Lartë, pastaj të gjykatave të tjera, të jenë ca shkallë bosh, pastaj të vijë Presidenti e të tjerët”, thoshte Fino.
“Brenda 6 muajve të ngrihet një grup ndërministror për të vendosur një kategorizim të ri të pagave”, kërkonte relatori i buxhetit në Komisionin e Ligjeve në vitin 2018.
Për fat, këtij propozimi i erdhi radha pas 9 vjetësh. Kjo sa për të kuptuar se si i identifikon maxhoranca problemet që duan zgjidhje.
Dy ditë më parë, Rama u pa në podin e seancave plenare duke përshkruar piramidën e pagave me të njëjtat xheste me të cilat dikur Bashkim Fino përshkruante një “piramidë të kthyer me këmbë përpjetë”.
