Një vrasje me armë zjarri ka tronditur Sarandën në orët e para të mëngjesit të së dielës. Ngjarja ka ndodhur në zonën e njohur si “Agjencia e Vjetër”, ku një 44-vjeçar është qëlluar me armë zjarri.
Viktima është identifikuar si Artan Myrtaj, 44 vjeç. Sipas të dhënave paraprake, ai është qëlluar nga dy persona, të cilët dyshohet se lëviznin me një motor dhe mbanin skafandra në kokë, çka ka vështirësuar identifikimin e tyre.
Nga të shtënat raportohet se ka mbetur i plagosur edhe një kalimtar i rastit, i cili është dërguar për ndihmë mjekësore.
Pas ngjarjes, në vendin e krimit kanë mbërritur shërbimet e Policisë dhe grupi hetimor, ndërsa janë ngritur pika kontrolli dhe po punohet për identifikimin dhe kapjen e autorëve.
Policia po administron provat në vendngjarje dhe po verifikon kamerat e sigurisë në zonë, ndërsa hetimet vijojnë për zbardhjen e plotë të rrethanave dhe identifikimin e autorëve.
