Edhe ishte kompensuar financiarisht si ish-pronar nga shteti për tokën e zënë, dhe të njëjtën pronë e përfitoi për së dyti, edhe fizikisht përmes abuzimit, prokuroria e Fierit çmonton skemën mes biznesmenit, drejtorit të kadastrës dhe hartografit.
Një tjetër urdhër arresti është ekzekutuar nga Policia e Shtetit me kërkesë të Prokurorisë së Fierit, në kuadër të hetimeve për tjetërsimin e kundërligjshëm të pronave në zonën e Levanit. Hetimi për këtë çështje është udhëhequr nga prokurorja Iva Hoxha.
Gjatë operacionit u arrestua ish-drejtori i Agjencisë Shtetërore të Kadastrës (ASHK) Fier, Ertis Shehu, si dhe shtetasi Ervin Habilaj, i dyshuar si përfitues i pronave me dokumente të falsifikuara.
Po ashtu, Gjykata caktoi masën e sigurimit “Detyrim për t’u paraqitur Emiljano Ruka, ish-hartograf pranë ASHK-së Fier.
Hetimet ndiqen për veprat penale “Falsifikimi i dokumenteve”, “Mashtrimi”, “Pastrimi i produkteve të veprës penale ose veprimtarisë kriminale” dhe “Shpërdorimi i detyrës”.
Objekti i hetimit lidhet me përfitimin, regjistrimin e kundërligjshëm, tjetërsimin dhe qarkullimin e vlerave monetare për pasuritë e paluajtshme në zonën e Levanit.
Sipas dosjes hetimore, fakti penal lidhet me një vendim të vitit 2008 të Agjencisë së Kthimit dhe Kompensimit të Pronave, i cili njohu të drejtën e kompensimit për 100 hektarë tokë bujqësore në Levan dhe Dërmënas. Në bazë të këtij procesi, shtetasi Ervin Habilaj, si një prej trashëgimtarëve, kishte përfituar kompensim financiar në vlerën 53.800.000 lekë me vendimin e Agjencisë së Trajtimit të Pronave në nëntor 2018.
Më vonë, gjatë vitit 2023, i njëjti shtetas dyshohet se ka ndjekur procedurat administrative pranë ASHK Fier për regjistrimin e 6 pasurive të tjera me sipërfaqe totale prej rreth 71.7 hektarësh në Zonën Kadastrale nr. 2436, duke u thirrur sërish në të njëjtin vendim të vitit 2008.
Hetimi ka evidentuar veprimet e ish-drejtorit Ertis Shehu dhe ish-hartografsh Emiljano Ruka sa i përket trajtimit administrativ e kadastral të këtij dokumentacioni.
Pas regjistrimit, një pjesë e këtyre sipërfaqeve dyshohet se janë shitur te të tretë, duke gjeneruar shuma të konsiderueshme monetare.
Në kuadër të veprimeve hetimore, organet e drejtësisë kanë sekuestruar preventivisht 715.976 euro në llogarinë bankare të shtetasit Ervin Habilaj, si dhe kanë konfiskuar dokumente, pajisje elektronike dhe prova të tjera materiale.
Hetimet po vijojnë për verifikimin e plotë të transaksioneve, gjurmimin e parave të përfituara dhe identifikimin e personave të tjerë të mundshëm të përfshirë në këtë skemë.
