Avokatët në Durrës bojkotuan këtë të premte për dy orë seancat gjyqësore, në shenjë proteste dhe solidariteti pas plagosjes me armë të kolegut të tyre, Elton Shllaku. Bojkoti u zhvillua nga ora 08:00 deri në 10:00 dhe përfshiu çështjet civile dhe penale, me përjashtim të seancave për masat e sigurimit.
Vendimi u mor nga Dhoma Vendore e Avokatisë Durrës, e cila kërkon që institucionet të marrin masa konkrete për garantimin e sigurisë së avokatëve gjatë ushtrimit të profesionit.
Kreu i Dhomës Vendore të Avokatisë, Lorval Petani, deklaroi se rastet që cenojnë jetën dhe sigurinë e avokatëve kërkojnë vëmendje dhe mbrojtje të posaçme institucionale. Dhoma i ka kërkuar gjithashtu Prokurorisë së Durrësit zhvillimin e një hetimi të shpejtë dhe të plotë për zbardhjen e rrethanave të ngjarjes.
Avokati Elton Shllaku, 52 vjeç, u plagos me armë zjarri në dorë pasditen e së mërkurës, në një lokal në lagjen nr. 1 të Durrësit. Ai u transportua në spital dhe ndodhet jashtë rrezikut për jetën.
Sipas të dhënave të deritanishme, ngjarja dyshohet se lidhet me një konflikt pronësie. Çështja e sigurisë së avokatëve pritet të diskutohet edhe në mbledhjen e ardhshme të Këshillit të Përgjithshëm të Dhomës Kombëtare të Avokatisë.
