Janë publikuar pamjet e konfliktit me thika mes disa të rinjve në Sarandë, ku mbetën të plagosur tre persona.
Ngjarja ndodhi rreth orës 22:00 të së mërkurës, brenda një berberhaneje pranë hyrjes së shëtitores, në lagjen nr. 1. Kamerat e sigurisë tregojnë momentin kur njëri prej të rinjve i afrohet 24-vjeçarit Elidon Shukulli dhe tenton ta godasë në befasi me thikë në qafë. Ky i fundit arrin të shmanget në kohë, ndërsa më pas nis përleshja mes të rinjve.
Si pasojë e konfliktit mbetën të plagosur vëllezërit Elidon Shukulli, 24 vjeç, dhe Mario Shukulli, 20 vjeç, si dhe Andi Saliaj, 19 vjeç. Ata u transportuan në urgjencën e Spitalit të Sarandës, ku morën ndihmën e parë mjekësore. Për shkak të gjendjes më të rëndë, Elidon Shukulli u dërgua drejt Tiranës për trajtim të specializuar.
Sipas të dhënave paraprake, konflikti dyshohet se ka nisur për motive të dobëta.
Policia e Sarandës njoftoi se ka arrestuar Kamelo Aliajn, 22 vjeç, Andi Saliajn, 19 vjeç, dhe Eduard Bajramin, 19 vjeç, të tre banues në Sarandë. Ata dyshohen se, në bashkëpunim me njëri-tjetrin, janë konfliktuar me dy vëllezërit, duke përdorur mjete prerëse. Hetimet vijojnë për zbardhjen e plotë të rrethanave të ngjarjes.
