Protesta qytetare vijon prej orës 09:00 në Tiranë, paralelisht me zhvillimin e seancës plenare në Kuvend.
Momente tensioni janë regjistruar pranë Ministrisë së Brendshme, ku një grup protestuesish është përplasur me efektivët e policisë. Disa prej tyre kanë hedhur letra higjienike në drejtim të uniformave blu, ndërsa një protestues ka tentuar të çajë kordonin policor pas një përplasjeje me një efektiv.
Policia ka ndërhyrë duke ndaluar protestuesin, veprim që është kundërshtuar nga qytetarët e tjerë të pranishëm në tubim.
Protestuesit, të vendosur përgjatë Bulevardit “Dëshmorët e Kombit”, kanë hequr gjithashtu një prej gardheve metalike të vendosura pranë Ministrisë së Brendshme dhe kanë tentuar të kalojnë kordonin e policisë. Për disa momente situata është tensionuar, duke sjellë edhe shtimin e forcave policore në zonë, ndërsa kanë mbërritur edhe forcat “Shqiponja”.
Pas qëndrimit dhe lëvizjeve në disa zona të qendrës së kryeqytetit, protestuesit kanë rinisur marshimin në drejtim të Kuvendit, ku po zhvillohet seanca plenare.
