Trupi gjykues në Hagë ka konstatuar se Zyra e Prokurorit të Specializuar (ZPS) arriti të vërtetojë përtej dyshimit të arsyeshëm kryerjen e krimit të luftës të arrestimit dhe ndalimit të paligjshëm ndaj së paku 385 personave.
Gjatë shpalljes së konstatimeve në procesin ndaj ish-krerëve të UÇK-së, gjykatësi Charles Smith deklaroi se në 14 komuna persona të lidhur me UÇK-në kishin ndërmarrë veprime për heqjen e lirisë së 385 personave që nuk merrnin pjesë në luftime.
Trupi gjykues konstatoi gjithashtu se 348 persona ishin trajtuar mizorisht, ndërsa 308 ishin torturuar. Sipas gjykatës, të ndaluarit ishin mbajtur në kushte çnjerëzore, në ndërtesa të ndryshme, përfshirë shkolla dhe stalla, pa shtroja, ujë dhe ushqim të mjaftueshëm.
Sipas konstatimeve të paraqitura nga Smith, shumë prej të ndaluarve ishin rrahur brutalisht, disa deri në atë masë sa nuk mund të qëndronin në këmbë, ndërsa disa kishin humbur jetën si pasojë e dhunës. Të ndaluarve u ishin shkaktuar gjithashtu vuajtje psikologjike.
Gjykata konstatoi se në qendra të ndryshme ndalimi në Kosovë dhe në veri të Shqipërisë ishin krijuar dhe mbajtur kushte çnjerëzore. Smith tha se të ndaluarit ishin goditur me shkelma, qytat e armëve dhe mjete të tjera, ndërsa disa prej tyre kishin pësuar pasoja afatgjata nga keqtrajtimi.
