Gjykata e Lartë ka rrëzuar kërkesën e Erion Veliajt, duke lënë në fuqi masën e sigurisë “arrest në burg” ndaj kryebashkiakut të Tiranës.
Kolegji Penal shqyrtoi këtë të martë, më 15 shtator, në Dhomë Këshillimi rekursin e Veliajt kundër masës së arrestit. Trupa gjykuese përbëhej nga gjyqtarët Sandër Simoni, Genti Shala dhe Valbon Cekrezi.
Çështja ishte rikthyer në Gjykatën e Lartë nga Gjykata Kushtetuese, e cila kishte kërkuar që të arsyetohej përse masa e “arrestit në burg” konsiderohej masa e vetme e përshtatshme ndaj kryebashkiakut.
Pas rishqyrtimit të çështjes, Kolegji Penal vendosi të lërë në fuqi vendimin e Apelit të GJKKO-së, duke bërë që Veliaj të vijojë qëndrimin në paraburgim.
Kryebashkiaku i Tiranës ndodhet në qeli që prej 10 shkurtit 2025, ndërsa çështja penale ndaj tij tashmë është në fazën e gjykimit në Gjykatën e Posaçme.
Veliaj po gjykohet në GJKKO për 13 akuza penale, mes të cilave korrupsion, pastrim parash, fshehje pasurie dhe shpërdorim detyre. Vendimi i Gjykatës së Lartë vjen pas një beteje të gjatë ligjore të Veliajt kundër masës së sigurisë, të cilën ai e ka kundërshtuar në disa shkallë të gjyqësorit.
Vendimi:
Kolegji Penal i Gjykatës së Lartë, i mbledhur në datë 15 shtator 2026, në Dhomë Këshillimi, mori në shqyrtim dosjen penale me palë:
Kërkues: Erion Veliaj
Palë e Interesuar: Prokuroria e Posacme kundër Korrupsionit dhe Krimit të Organizuar
Objekti: Shfuqizimin e vendimeve nr. 7, dt. 09.02.2025, te Gjykates se Posacme te Shkalles se Pare per Korrupsionin dhe Krimin e Organizuar, vleftesuar permes vendimit nr. 14, dt. 12.02.2025, te Gjykates se Posacme te Shkalles se Pare per Korrupsionin dhe Krimin e Organizuar; nr. 13, dt. 13.03.2025, te Gjykates se Posacme te Apelit per Korrupsionin dhe Krimin e Organizuar; nr. 00-2025-1153 (176), dt. 08.07.2025, te Kolegjit Penal te Gjykates se Larte. Shpenzimet gjyqesore ne ngarkim te subjektit te interesuar.
Pasi shqyrtoi çështjen, Kolegji, bazuar në nenin 441, pika 1, shkronja “e” të Kodit të Procedurës Penale, vendosi: Lënien në fuqi të Vendimit nr.13 (87-2025-85), datë 13.03.2025 të Gjykatës së Posaçme të Apelit për Korrupsionin dhe Krimin e Organizuar.
