Gjykata e Lartë shqyrton sot rekursin e kryetarit të Bashkisë së Tiranës, Erion Veliaj, kundër masës së arrestit me burg. Çështja do të shqyrtohet në dhomë këshillimi nga Kolegji Penal, i përbërë nga Sandër Simoni, Genti Shala dhe Valbon Cekrezi.
Dosja u kthye nga Gjykata Kushtetuese, e cila i la detyrë Gjykatës së Lartë të arsyetojë se përse masa e arrestit me burg është e vetmja masë e përshtatshme për kryebashkiakun Veliaj.
Vëmendja sot do të jetë te Gjykata e Lartë, e cila pritet të vendosë për fatin e të zgjedhurit vendor, në një periudhë të tensionuar politikisht dhe mes përplasjeve të forta brenda Partisë Socialiste, por edhe mes qeverisë dhe gjyqësorit.
Veliaj po gjykohet në GJKKO për 13 akuza penale, mes të cilave korrupsion, pastrim parash, fshehje pasurie dhe shpërdorim detyre. Ai mbahet në paraburgim që prej 10 shkurtit 2025.
