Të paktën 21 persona kanë humbur jetën, mes tyre fëmijë, pas shembjes së një ndërtese banimi në qytetin e Gazës, ndërsa dhjetëra të tjerë rezultojnë ende të zhdukur dhe dyshohet se ndodhen nën rrënoja.
Ndërtesa shumëkatëshe, e cila ishte dëmtuar më herët nga sulmet izraelite gjatë luftës, u shemb gjatë natës teksa brenda saj strehoheshin disa familje palestineze të zhvendosura. Rreth 100 persona besohej se ndodheshin në ndërtesë dhe në zonën përreth në momentin e shembjes.
Ekipet e Mbrojtjes Civile vijojnë kërkimet për të mbijetuarit. Drejtori i Mbrojtjes Civile në qytetin e Gazës, Raed Al-Dahshan, tha se nga poshtë rrënojave vazhdojnë të dëgjohen zëra, duke shtuar shpresat se mund të gjenden persona ende gjallë.
Operacioni i shpëtimit po zhvillohet në kushte të vështira për shkak të mungesës së pajisjeve të rënda. Punonjësit e shpëtimit dhe banorët janë detyruar në disa raste të largojnë rrënojat edhe me duar, ndërsa agjencitë e OKB-së dhe ekipet e ndihmës po marrin pjesë në operacion.
Ngjarja ka rikthyer shqetësimin për mijëra ndërtesa të dëmtuara nga lufta në Gaza, ku shumë familje vazhdojnë të jetojnë për shkak të mungesës së strehimit alternativ. Mbrojtja Civile thotë se rreth 2 mijë ndërtesa të dëmtuara vazhdojnë të banohen, ndërsa zyrtarë të OKB-së kanë paralajmëruar se qindra prej tyre rrezikojnë të shemben.
