Një zarf që përmbante një plumb dhe një letër me mesazhe kërcënuese është dërguar në Ministrinë e Arsimit dhe Meritës në Itali, në adresë të ministrit Giuseppe Valditara.
Zarfi ishte dorëzuar në ministri ditët e fundit, ndërsa më 16 shtator rasti është denoncuar pranë autoriteteve. Policia italiane ka nisur hetimet për identifikimin e autorit dhe zbardhjen e plotë të rrethanave të ngjarjes.
Pas publikimit të rastit, kryeministrja italiane Giorgia Meloni shprehu solidaritetin e saj dhe të qeverisë me Valditarën, duke dënuar kërcënimin. Ajo i cilësoi plumbin dhe letrën kërcënuese si akte frikësimi që nuk kanë vend në një demokraci dhe kërkoi një dënim të qartë nga të gjitha forcat politike.
Në mbështetje të ministrit reaguan edhe zëvendëskryeministri dhe ministri i Jashtëm Antonio Tajani, ministri i Kulturës Alessandro Giuli, si dhe drejtuesit e dy dhomave të Parlamentit italian. Tajani deklaroi se kërcënimet dhe dhuna nuk do të ndalin veprimtarinë e qeverisë, ndërsa autoritetet vijojnë hetimet për të zbuluar personat përgjegjës.
