Eno Agasi, kushëri i Ergys Agasit, përfundoi në pranga pas më shumë se tetë muajsh në arrati. Ai ishte në kërkim nga policia, pasi Gjykata e Tiranës caktoi ndaj tij masën e sigurisë “arrest me burg” për shkak se zhduku dhjetra shishe vere të zbuluara nga SPAK në kantinën në pronësi të Ergys Agasit, teksa ky i fundit u shpall në kërkim nën dyshimet se drejtonte një grup kriminal që vepronte brenda Agjencisë Kombëtare të Shoqërisë së Informacionit.
Vera u zbulua gjatë kontrolleve në ‘Equos Resort’ dhe për shkak të sasisë së madhe që shkonte nga 1 deri në 3 mln euro, u la në ruajtje. Por Enio Agasi vendosi ta zhvendoste verën dhe ta zhdukte, duke shkaktuar një nga skandalet që lidhen me zhdukjen e provave në një hetim penal, pasi vera dyshohet se ishte produkt i aktivitetit kriminal të Ergys Agasit.
Ky i fundit akuzohet si kreu i një grupi kriminal që vepronte brenda Agjencisë Kombëtare të Shoqërisë së Informacionit. Sipas SPAK ai në bashkëpunim me Ermal Beqirin urdhëronte rrëmbimin e rivalëve në biznes dhe nën kërcënim i detyronin të tërhiqeshin nga tenderat e AKSHI-t. Ergys Agasi u arrestua pak javë më parë në zonën e Plepave në Durrës teksa shoqërohej nga ish-zyrtari i policisë Ulian Shpataraku.
