Kryeministri Edi Rama ka reaguar lidhur me debatin për sistemin e pagave të magjistratëve, duke ftuar drejtuesit e institucioneve të gjyqësorit në një tryezë të përbashkët pune.
Përmes një postimi në rrjetin social X, Rama u bëri thirrje drejtuesve të dy këshillave dhe institucioneve të tjera të drejtësisë që t’i përgjigjen pozitivisht ftesës, me qëllim gjetjen e një zgjidhjeje të qëndrueshme dhe afatgjatë.
Sipas kryeministrit, zgjidhja duhet t’u garantojë magjistratëve një sistem të qëndrueshëm pagash, por njëkohësisht të ruajë ekuilibrin e përgjithshëm të piramidës shtetërore të pagave.
Rama bëri të ditur se në tryezë do të mirëpritet edhe pjesëmarrja e ekspertëve të Këshillit të Europës, si dhe kontributi i Komisionit Europian për Efiçencën e Drejtësisë.
Kryeministri theksoi se magjistratët gëzojnë sot një shkallë të lartë pavarësie dhe trajtohen me pagat më të larta në vend, si dhe ndër më të lartat në rajon. Sipas tij, kjo është rezultat i vullnetit të shumicës qeverisëse.
Rama deklaroi se qeveria nuk kërkon konflikt me gjyqësorin, por bashkëveprim institucional në respekt të pavarësisë së ndërsjellë.
“Nëse kemi mosdakordësi, na takon t’i trajtojmë me urtësi dhe durim, duke dhënë një shembull dinjiteti shtetëror për qytetarët tanë dhe partnerët e Shqipërisë”, shkruan Rama.
