Banesa ku jeton kardinali shqiptar Ernest Simoni, në Piazza Duomo, në zemër të Firences, ka rënë pre e një grabitjeje. Autorët kanë arritur të hyjnë në apartament duke çarë një mur me dalta, ndërsa më pas kanë marrë para, sende ari, bizhuteri, medalje dhe objekte të tjera me vlerë.
Sipas raportimeve të mediave italiane, dëmi i përgjithshëm vlerësohet në rreth 30 mijë euro. Mes sendeve të vjedhura ndodhet edhe leja e qëndrimit e kardinalit 97-vjeçar.
Në momentin kur ndodhi grabitja, kardinali Ernest Simoni nuk ndodhej në Firence. Kleriku shqiptar, i cili vuajti përndjekjen dhe burgimin gjatë regjimit komunist në Shqipëri dhe u emërua kardinal nga Papa Françesku në vitin 2016, ndodhej në Londër, ku kishte zhvilluar një takim me Mbretin Charles III.
Në apartament jetojnë gjithashtu nipi i kardinalit, Tonin Simoni, dhe bashkëshortja e tij. Çifti, që administron një restorant në Borgo Albizi, ishte larguar nga banesa rreth orës 13:00. Kur u kthyen, rreth orës 23:00, e gjetën shtëpinë të përmbysur dhe sendet të kontrolluara nga grabitësit.
Autorët çanë murin për të hyrë në apartament
Mënyra se si është realizuar grabitja ka ngritur pikëpyetje edhe te familjarët. Autorët dyshohet se kanë përdorur dy dalta për të hapur një kalim përmes murit. Mjetet më pas janë gjetur të braktisura në hapësirën e përbashkët të ndërtesës.
Pasi kanë arritur të futen në banesë, grabitësit kanë hapur derën e blinduar dhe kanë kontrolluar dollapët, sirtarët, kutitë dhe valixhet, në kërkim të parave dhe sendeve me vlerë.
Familjarët janë habitur veçanërisht nga fakti se autorët kanë pasur kohë të kryejnë një ndërhyrje të tillë pa u vënë re nga banorët e tjerë të ndërtesës. Sipas Tonin Simonit, askush nuk kishte dëgjuar zhurma apo kishte konstatuar lëvizje të dyshimta, përfshirë edhe një monsinjor që banon në katin e poshtëm.
“Jemi të tronditur nga ajo që ndodhi. Ndiheshim të sigurt. Mund të prisnim gjithçka, përveçse hajdutët të arrinin të bënin një gjë të tillë në Piazza Duomo, ndoshta edhe në mes të ditës”, është shprehur Tonin Simoni për mediat italiane.
Dyshime se familja mund të jetë vëzhguar
Pas konstatimit të grabitjes, në vendngjarje kanë mbërritur Karabinierët dhe ekspertët e hetimeve shkencore, të cilët kanë kryer këqyrjen e apartamentit dhe kanë kërkuar gjurmë që mund të çojnë në identifikimin e autorëve.
Hetuesit po analizojnë gjithashtu pamjet e kamerave të shumta të sigurisë të vendosura në zonën e Piazza Duomo.
Tonin Simoni dyshon se grabitësit mund t’i kenë vëzhguar më parë lëvizjet e familjes dhe të kenë zgjedhur momentin kur e dinin se në apartament nuk ndodhej askush.
“Sigurisht që nuk kanë vepruar rastësisht. Na kanë mbajtur nën vëzhgim dhe e dinin që nuk ishim në shtëpi”, ka deklaruar ai.
Deri më tani, megjithatë, nuk është bërë publik identiteti i autorëve dhe hetimet për zbardhjen e ngjarjes vazhdojnë.
Vidhet edhe leja e qëndrimit e kardinalit
Mes sendeve të marra nga banesa janë para cash, bizhuteri të bashkëshortes së Tonin Simonit, medalje, sende ari dhe objekte të tjera me vlerë personale. Grabitësit kanë marrë madje edhe një kabllo të një PlayStation-i të vjetër që u përkiste fëmijëve të familjes.
Një nga sendet më të pazakonta të vjedhura është leja e qëndrimit e kardinalit Ernest Simoni, e cila mbahej në një sirtar.
“Vjedhja e këtij dokumenti është mjaft e çuditshme, përveç rastit kur dikush ka ndërmend ta falsifikojë”, ka deklaruar nipi i kardinalit.
Në listën e sendeve të vjedhura përfshihen gjithashtu disa medalje dhe një vulë ari. Së bashku me paratë dhe objektet e tjera prej ari, dëmi i përgjithshëm llogaritet në rreth 30 mijë euro.
Kardinali pyeti për statujat fetare: “Atëherë, nuk ka problem”
Reagimi i kardinalit Ernest Simoni pasi u informua për grabitjen ka qenë i veçantë. Shqetësimi i tij i parë nuk kanë qenë paratë apo sendet me vlerë, por statujat fetare që mban në dhomën e tij.
“A e kanë lënë statujën e Zonjës së Medjugorjes? Po statujën e Padre Pios?”, ka pyetur kardinali, sipas rrëfimit të nipit të tij.
Tonin Simoni e ka siguruar se statujat nuk ishin dëmtuar dhe vazhdonin të ndodheshin në vendin e tyre.
“Atëherë, nuk ka problem”, është përgjigjur kardinali.
Hetimet për identifikimin e personave përgjegjës për grabitjen vijojnë. Autoritetet italiane po analizojnë gjurmët e gjetura në apartament, si edhe pamjet e kamerave të sigurisë në zonën e Piazza Duomo, me qëllim identifikimin dhe kapjen e autorëve.
