Mjekë, studentë të mjekësisë dhe aktivistë në Rotterdam kanë vendosur rreth 1400 palë këpucë të bardha në një instalacion përkujtimor, në nderim të punonjësve të shëndetësisë në Gaza që kanë humbur jetën gjatë konfliktit.
Aktiviteti u organizua nga fondacioni “Doctors for Gaza” dhe kishte në qendër leximin e emrave të punonjësve të shëndetësisë, ndërsa këpucët e bardha u përdorën si simbol i profesionistëve të mjekësisë që nuk janë më gjallë.
Organizatorët thanë se përmes këtij homazhi synuan të tërheqin vëmendjen ndaj pasojave të krizës humanitare në Gaza dhe ndikimit të saj te personeli mjekësor, i cili vijon të punojë në kushte të vështira.
Në aktivitet morën pjesë profesionistë të shëndetësisë, studentë dhe aktivistë, të cilët lexuan emrat e kolegëve të tyre gjatë ceremonisë përkujtimore.
