Detaje të reja janë bërë publike nga kontrolli i befasishëm në paraburgimin e Bradasheshit, në sektorin ku mbahet Ergys Agasi. Gazetarja Klodiana Lala tha se gjatë operacionit pati edhe një “fërkim” mes SPAK-ut dhe Policisë së Burgjeve lidhur me ambientet ku duhej të përqendroheshin kontrollet.
Sipas Lalës, Policia e Burgjeve kërkonte që verifikimet të kryheshin në qelinë e Agasit dhe në qeli të tjera, ndërsa SPAK këmbëngulte që kontrolli të shtrihej në kuzhinë dhe në ambientet e përbashkëta. Dyshohet se hetuesit kishin informacione që i orientonin drejt këtyre hapësirave.
Gjatë kontrollit u gjetën dhe u sekuestruan pije alkoolike dhe pajisje wireless. Pajisjet janë dërguar për ekspertim, ndërsa çështja e pijeve alkoolike i është referuar Prokurorisë së Elbasanit, pasi konsiderohen sende të palejuara në ambientet e paraburgimit.
Megjithatë, nga informacionet e bëra publike nuk është konfirmuar se sendet e sekuestruara i përkisnin Ergys Agasit. Ato janë gjetur në kuzhinën e sektorit ku ai mbahet i paraburgosur.
Agasi u arrestua më 26 gusht në Durrës, pas disa muajsh në kërkim, në kuadër të hetimeve të SPAK që lidhen me dosjen e AKSHI-t. Ndaj tij janë ngritur disa akuza, ndër të tjera për shkelje të barazisë në tendera, konkurrencë të paligjshme nëpërmjet dhunës, heqje të paligjshme të lirisë dhe pastrim të produkteve të veprës penale.
