Gjykata e Fierit ka lënë në burg dy ish-drejtorët e Kadastrës, Ertis Shehu dhe Bardhyl Kapaj, si dhe juristin Piro Çela, të përfshirë në hetimin për regjistrimin e një sipërfaqeje të konsiderueshme toke përmes dokumenteve të dyshuara si të falsifikuara. Për biznesmenin Kastriot Hasko, gjykata vendosi ndryshimin e masës së sigurisë në “arrest në shtëpi”.
Sipas Prokurorisë së Fierit, Hasko dyshohet se ka përdorur dy vendime të falsifikuara të Komisionit të Kthimit dhe Kompensimit të Pronave, përmes të cilave janë regjistruar rreth 1,143 hektarë tokë në zonat e Semanit të Ri dhe Sheq Marinas. Hetuesit dyshojnë se më pas, përmes një prokure të falsifikuar, prona është shitur te dy shoqëri të ndryshme.
Në dosjen hetimore ngrihen dyshime edhe mbi veprimet e ish-drejtuesve dhe specialistit të ASHK-së, të cilët, sipas Prokurorisë, kanë kryer regjistrimin e pronave pa verifikuar më parë autenticitetin e dokumentacionit të paraqitur.
Hetimet kanë evidentuar gjithashtu një rast ku sipërfaqja e regjistruar rezulton më e madhe se ajo e përcaktuar në dokumentin e dyshuar si të falsifikuar. Po ashtu, dyshohet se është ndryshuar zëri kadastral i pronës nga “tokë arë” në “tokë pa frut”, pa ekzistencën e aktit administrativ përkatës.
