Florian Hysi nuk do të jetë më në krye të Agjencisë së Trashëgimisë Kulturore në Gjirokastër. Ai ka vendosur të largohet nga detyra pas reagimeve të shumta publike dhe komenteve në rrjet lidhur me mënyrën se si u prezantuan veshjet e heroit kombëtar Çerçiz Topulli në Muzeun e Kalasë.
Shkak për debatin u bë manekini i përdorur për ekspozimin e veshjeve, veçanërisht portreti i vendosur mbi të, i cili u konsiderua i papërshtatshëm për një figurë të rëndësishme të historisë shqiptare. Pas kritikave, portreti është hequr dhe veshjet janë vendosur në një manekin pa fytyrë.
Hysi ia ka dorëzuar dorëheqjen kryebashkiakut të Gjirokastrës, Flamur Golemi, duke marrë përsipër përgjegjësinë për mënyrën se si ishte realizuar ekspozimi.
Në deklaratën e largimit nga detyra, ai thotë se vendimi është marrë për shkak të përgjegjësisë që duhet të mbajë çdo drejtues për vendimet dhe gabimet e mundshme gjatë ushtrimit të funksionit.
“Ajo që u konsiderua gabim u korrigjua dhe marr të gjithë përgjegjësinë përsipër”, shprehet Hysi.
Ai falënderon Bashkinë e Gjirokastrës, kolegët dhe punonjësit e Agjencisë së Trashëgimisë Kulturore, ndërsa thekson se gjatë periudhës në detyrë janë realizuar disa punë në fushën e muzeve dhe trashëgimisë.
“Dorëheqja ime nuk është dorëzim nga ajo që besoj. Është një akt përgjegjësie dhe respekti për institucionin”, shkruan ai.
Në fund të deklaratës, Hysi shprehet se do të vijojë të mbështesë Gjirokastrën dhe trashëgiminë e saj kulturore, ndërsa e mbyll me mesazhin:
“Ne u përpoqëm, atë që u konsiderua gabim e korrigjuam dhe punën do ta lëmë të flasë vetë”.
