Debatet për rolin e Kuvendit, kontrollin parlamentar ndaj qeverisë dhe zbatimin e reformave shoqëruan Takimin e 22-të të Komitetit Parlamentar të Stabilizim-Asociimit Shqipëri-Bashkimi Europian.
Kreu i grupit parlamentar të PS, Taulant Balla, u ndal te procesi i integrimit europian, duke deklaruar se objektivi i Shqipërisë është përfundimi i negociatave të anëtarësimit deri në vitin 2027.
Nga ana tjetër, kreu i grupit parlamentar të Partisë Demokratike, Gazment Bardhi, ngriti shqetësimin për rolin e opozitës në Kuvend. Ai deklaroi se opozitës po i mohohen mekanizmat e kontrollit parlamentar ndaj qeverisë, duke kritikuar mënyrën e funksionimit të institucioneve dhe të shumicës parlamentare.
Në diskutime u përfshi edhe përfaqësuesi i PD-së, Ivi Kaso, i cili u ndal te Reforma Administrativo-Territoriale. Sipas tij, çdo ndërhyrje në këtë reformë duhet të realizohet përmes konsensusit mes mazhorancës dhe opozitës.
Takimi u shoqërua me qëndrime të ndryshme mes palëve për funksionimin e Parlamentit, raportin mes mazhorancës dhe opozitës, si dhe reformat që lidhen me procesin e integrimit të Shqipërisë në Bashkimin Europian.
