Hetimet ndaj ish-zëvendëskryeministres Belinda Balluku kanë rikthyer për herë të tretë në SPAK ish-futbollistin e Kombëtares, Igli Tare. Ai u paraqit mëngjesin e së hënës dhe dha shpjegime para hetuesve të Byrosë Kombëtare të Hetimit lidhur me një vilë luksoze në Palasë.
Prona rezulton e regjistruar në emër të Tares, por sipas hetimeve të SPAK dyshohet se është pasuri e fshehur e Ballukut. Vila është vendosur tashmë nën sekuestro.
Sipas SPAK, ndërtimi i vilës deri në fazën e karabinasë është financuar nga Tare, ndërsa pjesa tjetër e investimit dyshohet se është kryer nga kompania “Alko Impex General Konstruktion”, e Arbër Abazit. Kjo kompani ka përfituar tendera publikë gjatë periudhës kur Balluku drejtonte Ministrinë e Infrastrukturës.
Tare, i cili po hetohet për pastrim parash, nuk dha deklarata për mediat pas paraqitjes në SPAK.
Më herët, Prokuroria e Posaçme ka sekuestruar edhe një vilë tjetër luksoze në Dhërmi, gjithashtu të regjistruar në emër të Tares, por që sipas hetuesve zotërohet në mënyrë të tërthortë nga Balluku.
Ish-ministrja e Infrastrukturës po hetohet për korrupsion, pastrim parash dhe fshehje pasurie, ndërsa është marrë e pandehur për shkelje të barazisë në disa procedura tenderuese me vlera miliona euro.
Ndaj Ballukut janë në fuqi masat e sigurisë “ndalim për të dalë jashtë vendit” dhe “pezullim nga ushtrimi i funksioneve”.
