Ministri i Brendshëm Ervin Demo mblodhi këtë të hënë në një takim drejtuesit e policisë në qarqe dhe ngriti shqetësimin për situatën kriminale në Sarandë, ku gjatë dy viteve të fundit janë shënuar një sërë atentatesh mafioze, më i fundit ai ndaj Artan Murtos ditën e djeshme. Demo kërkoi ngritjen e një task-force të posaçme për hetimin e krimeve dhe tha se ishte konsultuar me kryepolicin Hitaj për të shkrirë të gjithë zinxhirin drejtues të Komisariatit të Sarandës.
Pas këtij takimi, Drejtoria e Përgjithshme e Policisë së Shtetit informoi se Hitaj ka urdhëruar ngritjen e një grupi të posaçëm, me ekspertët më të mirë të Departamentit të Policisë Kriminale dhe të Departamentit të Sigurisë Publike, me qëllim kryerjen e një rivlerësimi të plotë dhe të thelluar të situatës kriminale në rrethin e Sarandës, në bashkëpunim me DVP Vlorë, stafin drejtues të Komisariatit të Policisë Sarandë dhe strukturat e tij hetimore.
“Gjithashtu, po kryhet një rivlerësim i performancës së të gjithë zinxhirit drejtues të Komisariatit të Policisë Sarandë, si dhe i efektivëve të rolit bazë dhe të rolit të parë drejtues. Në bazë të performancës së tyre, do të ndërmerren veprimet e duhura”, njoftoi policia.
Sipas Policisë së Shtetit, po punohet për krijimin e strukturave të specializuara për hetimin e krimeve të rënda dhe luftën kundër krimit të organizuar, si dhe për garantimin e mbështetjes së tyre me bazën e nevojshme logjistike. A janë këto lëvizje një luftë e ftohtë mes Demos dhe Hitajt? Kjo mbetet për t’u parë. Fakt është që Saranda, pa frikë, mund të konsiderohet për momentin një ndër qytetet më problematike sa i përket krimit të organizuar.
