Anglia dhe Uellsi do të krijojnë gjykata të specializuara për rastet e përdhunimit dhe veprave të tjera të rënda seksuale, në një përpjekje për të ulur vonesat e gjata në sistemin e drejtësisë dhe për të shmangur traumatizimin e mëtejshëm të viktimave.
Masat e reja, të shpallura nga kryeministri Andy Burnham, parashikojnë që brenda dy viteve çdo gjykatë e Kurorës të ketë të paktën një sallë të posaçme për shqyrtimin e këtyre çështjeve. Viktimat e dyshuara do të kenë mundësi të ndjekin procedurat në distancë dhe të japin dëshmi nga një dhomë e veçantë përmes lidhjes me video, pa qenë të detyruara të ndodhen fizikisht përballë të pandehurve.
Në ndërtesat ku kushtet arkitekturore e lejojnë, do të krijohen hyrje dhe ambiente pritjeje të veçanta për viktimat, në mënyrë që ato të mos përballen me të akuzuarit apo me familjarët e tyre në korridoret e gjykatës. Stafi i gjykatave do të trajnohet për të punuar me raste traume, ndërsa çdo viktimë do të ketë një person të vetëm kontakti gjatë procesit.
Nga muaji i ardhshëm, gjyqet për përdhunim dhe vepra të rënda seksuale do të marrin datë fikse, në vend që të futen në listat e lëvizshme të çështjeve, ku seancat shpesh shtyhen në minutën e fundit. Qeveria britanike thotë se synimi është të “ribalançohet peshorja e drejtësisë” dhe viktimat të vendosen në qendër të procesit.
Organizata Rape Crisis England and Wales e ka cilësuar vendimin si një “hap të rëndësishëm përpara”, duke theksuar se shumë prej këtyre masave ishin kërkuar prej vitesh nga grupet që mbështesin viktimat e dhunës seksuale.
Reforma vjen në një moment kur sistemi britanik i drejtësisë përballet me vonesa të mëdha. Në fund të marsit, prapambetja në Gjykatat e Kurorës ishte rreth 80 mijë çështje, ndërsa sipas Rape Crisis, më shumë se 15 mijë prej tyre lidhen me vepra seksuale. Të dhënat zyrtare tregojnë gjithashtu se vetëm 2.8 për qind e rasteve të përdhunimit të regjistruara nga policia në vitin deri në mars 2024 përfunduan me ndjekje penale.
Një studim i mëparshëm i Zyrës Kombëtare të Statistikave tregonte se vetëm një në gjashtë viktima të përdhunimit apo tentativës për përdhunim e kishte raportuar sulmin në polici. Më shumë se një e treta e tyre thanë se nuk kishin besim se policia mund t’i ndihmonte, ose se procesi do të ishte poshtërues.
Qeveria thotë se masat e reja do të kushtojnë rreth 23 milionë paund nga buxheti i Ministrisë së Drejtësisë. Megjithatë, ministrja për viktimat, Alex Davies-Jones, ka pranuar se sallat e specializuara nuk mjaftojnë të vetme për të zgjidhur krizën e vonesave dhe ka theksuar nevojën për reforma më të gjera në gjykata.
Vendimi u nxit edhe nga rasti i deputetes laburiste Charlotte Nichols, e cila hoqi dorë nga e drejta automatike e anonimitetit dhe foli publikisht në Parlament për përdhunimin e saj. Ajo tregoi se kishte pritur më shumë se 1 mijë ditë për të shkuar në gjykatë, duke kërkuar ndryshime të thella në mënyrën se si sistemi trajton viktimat e dhunës seksuale.
