Kancelari gjerman Friedrich Merz e ka cilësuar si një “goditje të rëndë” rezultatin e CDU-së në zgjedhjet rajonale në Mecklenburg-Vorpommern, ku partia e tij nuk arriti të kalojë pragun elektoral prej 5 për qind dhe mbeti jashtë parlamentit të landit.
Pas mbledhjes së drejtimit të CDU-së në Berlin, Merz pranoi peshën e rezultatit, por përjashtoi mundësinë e dorëheqjes nga posti i kancelarit apo drejtimit të partisë.
“Kjo është një goditje e rëndë”, deklaroi Merz, duke shtuar se rezultatet dhe arsyet që qëndrojnë pas tyre “shkojnë shumë përtej personit tim”. Sipas tij, Gjermania po përjeton një transformim të thellë të sistemit politik, një proces që, sipas kancelarit, po shfaqet edhe në vende të tjera.
Në Mecklenburg-Vorpommern, AfD-ja doli forcë e parë me 38.2 për qind të votave, e ndjekur nga SPD-ja me 35.5 për qind. CDU-ja e Merzit mori vetëm 4.9 për qind, duke mbetur nën pragun prej 5 për qind dhe duke humbur për herë të parë përfaqësimin në parlamentin e këtij landi.
Merz iu referua gjithashtu rezultateve në Berlin, ku Die Linke doli e para me 25.7 për qind, ndërsa CDU-ja u rendit e dyta me 18.8 për qind dhe AfD-ja e treta me 16.3 për qind.
Duke komentuar rezultatet, kancelari gjerman tha se rritja e partive në skajet e spektrit politik po ndryshon peizazhin politik të vendit. Ai theksoi se CDU-ja do të analizojë rezultatet dhe do të nxjerrë mësime për të ardhmen.
Merz falënderoi gjithashtu partneren e koalicionit qeverisës, Partinë Socialdemokrate, për konfirmimin se do të vijojë të qëndrojë në qeveri. Ai tha se koalicioni duhet të vazhdojë punën për reformat, duke pranuar njëkohësisht se qeveria duhet t’u përgjigjet shqetësimeve të qytetarëve për vendet e punës, familjet, pensionet dhe sistemin shëndetësor.
“Duam ta çojmë përpara procesin e reformave, por e dimë se u detyrohemi njerëzve përgjigje lidhur me shqetësimet dhe frikën e tyre”, tha Merz.
Kancelari argumentoi se detyra e qeverisë së koalicionit është të përgatisë Gjermaninë për vitet e ardhshme përballë këtyre sfidave. Megjithë rezultatin e dobët të CDU-së në zgjedhjet rajonale, Merz deklaroi se do të vazhdojë në detyrë dhe do të mbajë përgjegjësinë për procesin e reformave.
Zgjedhjet e 20 shtatorit kanë sjellë rezultate të ndryshme në dy landet. Në Mecklenburg-Vorpommern, AfD-ja doli e para, ndërsa në Berlin rezultatin më të lartë e mori Die Linke. Për CDU-në, rezultati në Mecklenburg-Vorpommern shënon një nga goditjet më të mëdha elektorale në historinë e saj.
