Administrata e presidentit amerikan Donald Trump po përgatitet të vendosë sanksione të gjera ndaj Gjykatës Penale Ndërkombëtare (ICC), në një përshkallëzim të ndjeshëm të përplasjes së Uashingtonit me institucionin me seli në Hagë.
Sipas The Wall Street Journal, që citon zyrtarë amerikanë dhe dokumente të shqyrtuara nga gazeta, masat e propozuara do të ndalonin shumicën e transaksioneve financiare me ICC-në pas një periudhe tranzitore prej gjashtë deri në shtatë muaj.
Kufizimet mund të godasin ndjeshëm funksionimin e Gjykatës, duke i vështirësuar përdorimin e dollarit amerikan dhe aksesin në pjesë të rëndësishme të sistemit financiar ndërkombëtar.
Një vendim përfundimtar ende nuk është marrë. Masat mund të finalizohen gjatë javës së Asamblesë së Përgjithshme të Kombeve të Bashkuara ose në ditët që pasojnë.
Përplasja mes Uashingtonit dhe ICC-së u thellua pas lëshimit në vitin 2024 të urdhër-arresteve për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, nën akuza për krime lufte dhe krime kundër njerëzimit lidhur me luftën në Gaza. Të dy i kanë mohuar akuzat.
Administrata Trump ka vendosur më parë sanksione ndaj disa zyrtarëve të ICC-së, por masat e reja do të shkonin më tej, duke synuar transaksionet me vetë institucionin.
Sekretari amerikan i Shtetit, Marco Rubio, ka qenë një nga kritikët më të ashpër të Gjykatës, duke argumentuar se veprimet e saj ndaj zyrtarëve të vendeve që nuk janë palë e Statutit të Romës krijojnë një precedent të rrezikshëm dhe cenojnë sovranitetin amerikan.
As Shtetet e Bashkuara dhe as Izraeli nuk janë shtete palë të Gjykatës Penale Ndërkombëtare.
