Earl Spencer, vëllai i Princeshë Dianës, ka krahasuar mënyrën se si Princi Harry dhe Meghan Markle janë trajtuar nga një pjesë e medias britanike me presionin mediatik që, sipas tij, përjetoi motra e tij.
Në një intervistë për BBC, Spencer e përshkroi ndikimin e mbulimit të vazhdueshëm negativ mediatik si “kancerogjen”, duke argumentuar se historia e Dianës duhet të shërbejë si paralajmërim për të mos përsëritur të njëjtat gabime.
“Nuk jam këtu për të folur në emër të Harry-t dhe Meghan-it, por për këdo që po shkatërrohet në këtë mënyrë çdo ditë, kjo duhet të ketë një ndikim kancerogjen në jetën e tyre”, u shpreh ai.
Spencer tha se kishte parë nga afër ndikimin që presioni dhe kritikat e vazhdueshme të medias patën mbi Princeshë Dianën. Sipas tij, mënyra se si disa tabloide shkruajnë sot për Harryn dhe Meghanin sjell “jehona” të asaj që ndodhi me motrën e tij.
Ai shtoi se Diana ishte dëmtuar rëndë nga kritikat dhe vëmendja intensive mediatike, ndaj e konsideron shqetësuese përsëritjen e një klime të ngjashme ndaj çiftit.
Deklaratat vijnë ndërsa Spencer është përfshirë edhe në një debat publik lidhur me Mbretin Charles III dhe ngjarjet pas vdekjes së Dianës në vitin 1997.
Në librin e tij të ri me kujtime, Spencer pretendon se Charles kishte thënë pas vdekjes së Dianës: “Do ta harrojmë shpejt”.
Buckingham Palace ka reaguar ndaj pretendimit, duke vënë në pikëpyetje saktësinë e kujtimeve të Spencer. Pallati argumentoi se dhimbja e humbjes së një motre mund të ndikojë në arsyetimin, gjykimin dhe mënyrën se si ngjarjet kujtohen shumë vite më vonë.
Deklaratat e Spencer rikthejnë kështu në vëmendje marrëdhënien e tensionuar mes familjes mbretërore dhe medias britanike, si dhe debatin mbi ndikimin që ekspozimi intensiv publik mund të ketë në jetën personale të anëtarëve të saj.
